المذيعة : اسم حضرتك
المواطن: كوكى وائل
المذيعة : احكى لنا شوية عن ايام زمان
المواطن: أحكى ايه ولا ايه ولا ايه عن زمان ....
والنبي متفكرنيش بايام العز....ايام الرخص...أيام الاحترام....
طب ده انا مثلا فاكر من حوالى 40 - 45 سنة كدة
كان الواحد مننا ياخد من ابوة المصروف10او 15 جنيه فى اليوم
وكانوا بيكفوا...ومابيفتحش بقه...مش زى دلوقتى....الله يكون فى عوننا...
.ده انا فاكر ان عمرى ما ناقشت بابا وائل الله يرحمه ف المصروف....
زمان الواحد كان محترم في لبسه كان الولد لابس البادي الكات
والبنطلون النجر او البنطلون الجينز الديرتى المقطع و خلاص.....
والبنت تلاقيها ماشية باحترامها لابسة المينى جيب والاستوماك
او البنطلون الاستريتش و خلاص...لكن لبس اليومين دول....
مايتوصفش....اجارك الله
زمان المصاريف كانت محدودة ...فين ايام ما كيلو اللحمة كان بـ 45 جنية بس...
.. كانت ايام ..
وبعدين زمان كانت ابواب البيوت تتقفل من بدري يعنى الساعة 4 الفجر كدة...
وكان الابهات ليهم شنة و رنة....يعنى ماتلاقيش واحد بيعلى صوته على ابوه
و لا بيمد ايده على امه....غير لو زعقوا له او ابتدوا معاه بالصوت العالى....
(هنا الوضع يختلف)
زمان كنا بنذاكر على الاغانى الطربية الاصيلة....فين ايام الاغانى الاصيلة
زى بحبك يا حمار و العنب العنب العنب و العبد والشطان....لكن اغانى اليومين دول
لا ليها طعم ولا لون و الكلمات بقت مبتذلة ومالهاش معنى....
طب بذمتك كدة قارنى بين مطربات زمان زى الست روبى
و الست هيفا....لكن مغنيات اليومين دول
ولا المطربين بتواع زمان الليثى و لا عبد الباسط حمودة و لا بعرور و لا مين ولا مين .........
بيعتمدوا على حاجات تانيه غير الفن ....فين ايام الفن الاصيل
احمدوا ربنا بقى على الأيام إللي انتوا فيها
الخميس أغسطس 04, 2011 5:14 pm من طرف زائر
